呂布常被恥笑三姓家奴，但細細個打光榮嘅《三國誌》，攻略形容呂布，一定係「天下無雙之戰力」，打就打得，政治素質如何呢？領導能力又如何呢？

政治，助王允除國賊董卓，從二打六，到一方諸侯，從此舞台多左個呂布戰隊。

領導才能如何？高覽、張遼此二將，都好打得，尤其係張遼後來，戰孫權一役，以少勝多，殺孫權大軍丟盔棄甲，差啲活捉孫權。手下都咁勇猛，反證呂布真係天下無雙戰力。

呂布人生軌跡，以他的背景，如果想獨霸一方，別無選擇，99%會出現殺義父丁原、討伐義父董卓，呂布個人行為不符傳統美德，丁原、董卓亦咎由自取，又唔見曹操做呂布義父或義兄？就係丁、董二人，只知呂布才能，不知他人生軌跡傾向。曹操手下，大把不忠不義嘅人，從無整個義子、義弟出黎。

曹操官宦世家、劉備老吹係王族、孫權老豆做官、袁紹和袁術係官二代…大部分諸候都有顯赫背景，就係呂布呢啲基層公務員，想嶄露頭角，唔用西方人手段，可能不會出現温候呂布。

好可惜，佢生在傳統文化推祟仁、義、禮、信嘅中國，所以佢動機係上進，手段不合傳統美德，最後失敗係必然，成功係偶然。

如果佢生在羅馬凱撒年代，可能係一個出類拔萃嘅奇才，羅馬人以下犯上慣，凱撒就係比人在議事廳一心一刀，吉瓜左，吉佢嘅人，仲係佢身邊最信任嘅人，無受法律制裁，仲係英雄，因為打著旗號，阻止獨裁者暴政。

俱往矣，對今日嘅我哋有咩幫助呢？走去四圍認義父，以下犯上，力求晉級？不然！從種種客觀條件細微徵兆，發現呢啲觸犯傳統美德嘅事，就要諗辦法切斷，改寫自己故事發展，減少犯錯。

唔好要求咁高，做啱嘅事，除非覺得自己勁過孔子，「孔子七十而從心所欲，不逾矩。」孔子七十歲先不犯錯，無話從心所欲做啱嘢喎（利申：亂咁解，借黎條飾者）

誠哥，佢一生只做啱三個決定，就有今日嘅成就，所以普通人，唔做重大錯誤決定，就算唔係蘇東玻：「無災無難到公卿 」（蘇東坡做官愈做愈細，可能佢覺得公卿，真係愚且魯。所以佢咁醒目，咪比啲愚且魯嘅公卿，「請」去啲民智未開嘅地方教化人。）兩餐温飽，平平安安過一生都係可以做到嘅。